ДАДАЕВ Қаҳрамон (1936.15.12, Тошкент) — созанда (доира), Ўзбекистон халқ артисти (1977). Глиэр номидаги Республика мусиқа мактаби, Ҳамза номидаги Тошкент мусиқа билим юртида таълим олган. Доира ижрочилик анъаналарини Ўзбекистонда хизмат кўрсатган артист Т. Иногомов ва Ғ. Иногомовлардан ўрганган. Тошкент хореография билим юрти (1953—54), Ўзбек давлат эстрадаси (1954—57), «Баҳор» рақс ансамбли (1957—97)да созанда, мазкур ансамбль ташкилотчиларидан. М. Турғунбоева, И. Оқилов, Е. Барановский ва Қ. Миркаримовалар билан «Учрашув», «Ҳаваскор», «Салом» каби хореографик композициялар ҳамда «Пилла», «Занг», «Катта ўйин», «Ларзон», «Чўпон», «Фарғонача», «Фарғона рубоийси», «Бухороча», «Хоразмча» каби ўнлаб рақсларни саҳнага қўйиш ва яратишга катта ҳисса қўшган. Айниқса, ўзига хос тарзда, бир йўла 2—3 доирада якка ижро этган «Ўзбек доира усуллари» туркуми, катта артистик маҳорат билан ижро этган доира ўйин («Ҳаваскор», «Қўғирчоқ» каби)лари машхур. Т. Сайфиддинов, Ўзбекистонда хизмат кўрсатган артистлар ака-ука Исломовлар, Ҳ. Расулов, Ҳ. Азимов ва б. Д. шогирдларидир. 80 дан ортиқ мамлакатларда гастролда бўлган. 6-Жаҳон ёшлар фестивали лауреати (1957, Москва), собиқ Иттифоқ Давлат мукофоти лауреати (1973). Дадаев ҳақида «Ўзбектелефильм» студиясида «Қаҳрамон Дадаев чалади» номли фильм суратга олинган (1983, реж. Ш. Бизатов).