МОЛЙИҒАР — янги тушган келинчакнинг уйига ёйилган сепларни йиғиш маросими. Ўзбек хонадонларида келин тушдининг эртасига келиннинг сеплари куёвнинг қариндошлари, қўни-қўшнилар ва келин кўрдига келганларнинг кўриши учун келин тушган хонага ёйиб қўйилади. Маълум муддат ўтгач, келинкуёв томон аёллари, қўшнилар тўпланишиб, ёйилган сеплар йиғиб олишади. Молйиғар маросими тобора таомилдан қолиб бормоқда.