МИШКОЛЬЦ — Венгриянинг шим.шарқий қисмидаги шаҳар. Шайо дарёси бўйида, Бюкк тоғи этакларида жойлашган. Боршод-Абауй-Земплен медьесининг маъмурий маркази. Аҳолиси 178 минг киши (1999). Аҳамияти жиҳатидан мамлакатда 2-ўриндаги (Будапештдан кейин) саноат маркази. Қора металлургия, машинасозлик (жумладан, станоксозлик, оғир машинасозлик, электротехника, транспорт), цемент, тўқимачилик, ойнашиша, тикувчилик, ёғочсозлик, озиқ-овқат саноати корхоналари мавжуд. Қурилиш материаллари ишлаб чиқарилади. Политехника ин-ти, музейлар, театр бор. 13—16-а. ларда қурилган меъморий обидалари сақланган. Мишкольц шаҳар яқинидаги Лиллафюред курортлари билан Бюкк миллий боғи таркибида. Шаҳар яқинида қўнғир кўмир қазиб олинади.