МАГНИЙОРГАНИК БИРИКМАЛАР — углерод — магний боғи бўлган бирикмалар. Умумий формуласи R2Mg ёки RMgX (X — галоген). Магнийорганик бирикмаларни симобди-алкилларнинг магний билан ўрин алмашиниш реакцияси ёрдамида олиш мумкин: (CH3)2Hg+Mg-»(CH3)2Mg+Hg Худди шу усул билан диметил-, диэтил-ва дифенилмагнийлар олинган. Улар эфирларда эриб, эфиратлар ҳосил қилади. Бу бирикмалар кислород, карбонат ангидрид, сув билан фаол реакцияга киришади. Ҳавода ўз-ўзидан алангаланади. Шунинг учун магнийдиалкиллар амалда деярли ишлатилмайди. П. Барбье ва В. Гриньянлар томонидан амалда илк бор қўлланган аралаш Магнийорганик бирикмалар (RMgX) органик кимёнинг тараққиётида мухим роль ўйнайди. Магнийорганик бирикмалар саноатда баъзи металл органик бирикмаларни, хушбўй ва дори моддаларини синтез килишда ишлатилади.