МАГНИТОСТРИКЦИОН ЎЗГАРТИРГИЧ — магнит майдон энергиясини механик тебранишлар энергиясига ёки аксинча ўзгартириб берадиган электротехник ва электроакустик қурилма. Иши материалларнинг ўз шакли ва ўлчамларини ўзгартириш (магнитострикция) хусусиятига асосланган. Тузилиши магнитострикцион материалдан ясалган ўзак (магнит ўтказгич) ва унга ўралган сим чулғамидан иборат. Ўзак стержень шаклида ёки ҳалқасимон шаклда бўлади. Магнитострикцион ўзгартиргич таркатувчи ва қабул қилувчи бўлиши мумкин. Тарқатувчи Магнитострикцион ўзгартиргичда ўзгарувчи электр токи чулғамдан ўтиб, ўзгарувчан магнит майдонини вужудга келтиради. Унинг таъсирида ўзак дам-бадам ўз шакли ва ўлчамларини ўзгартиради. Қабул қилувчи Магнитострикцион ўзгартиргичда ўзакка ташқи механик кучлар (мас, товуш тўлқинлари) таъсир қилади, натижада ўзакда ўзгарувчан магнит майдон, чулғамда эса электр юритувчи куч вужудга келади. Магнитострикцион ўзгартиргич гидроакустик ва ультратовуш қурилмаларида, электр ва радиотехника жиҳозларида, машиналар, бинолар ва иншоотларнинг титрашини ўлчаш ва б. да қўлланилади.