МАГНИТ МИЛИНИНГ ЭНКАЙИШИ — магнит мили ўқи билан горизонтал текислик орасидаги вертикал бурчак. М. м. э. Ер магнит қутбларининг Ер чуқурлигида жойлашиши билан боғлиқ. Шим. ярим шарда магнит милининг шим. учи, жан. ярим шарда эса жан. учи пастга энкаяди. Ер магнит қутбларига яқинлашган сари М. м. э. ошиб боради ва қутбларда 90° га етади. Магнит компасининг аниқ ишлаши учун Магнит милининг энкайишининг салбий таъсирини камайтириш керак. Бунга магнит милида жойлашган махсус юкчани суриш билан эришилади. Ер шарининг сиртида Магнит милининг энкайишининг тарқалиш кўрсаткичи махсус изоклин хариталарда тасвирланади.