МАГЕЛЛАН БЎҒОЗИ — Жан. Америка материги билан Оловли Ер архипелаги орасидаги бўғоз. Атлантика океанини Тинч океан билан боғлайди. Уз. 575 км, энг тор жойи 2,2 км, фарватерида энг саёз жойининг чуқ. 19,8 м. Кучли ғарбий шамоллар бўлиб туради. Сув ости қоялари ва саёзликларининг кўплиги кема қатновини қийинлаштиради. Магеллан бўғозига Оловли Ердан музликлар келиб тушади. Пунта-Аренас (Чили) порти бор. Бўғоз илк бор (1520 й.) уни кесиб ўтган португал денгизчиси Ф. Магеллан номи б-н аталган.