ИВАНОВ Алексей Николаевич (1905.1.8, Ульяновск – 1987.24.5, Тошкент) — ҳайкалтарош, Ўзбекистон халқ рассоми (1955). Самара бадиий техника устахонасида ишлаган (1919 — 20). 1929 й. дан Самаркандда, кейинроқ Тошкентга келиб, ижодий иш билан шуғулланган. Илк асари — «Китоб ушлаган ўзбек қизи» (1937). Асарларини асосан гипсда ишлаган: «Шахтёр» (1947), «Звено бошлиғи» (1953), «М. Турғунбоева» (1955), «Ибн Сино» (1956) ва б. ҳайкаллари, Меҳнат Каҳрамонлари (М. Убайдуллаева, О. Йўлдошева, Н. Ниёзов, Ҳ. Турсунқулов ва б.) портретлари устида ишлаган; 50—60й. ларда меҳнат аҳли акс этган ҳайкаллар («Пўлат қуювчи», «Чўпон», «Пайвандчи қиз» ва б.), Ҳ. Олимжон бюсти (бронза, 1958) ни яратди.