ИНТЕРМЕЦЦО (итал. intermezzo — танаффус) — якка соз, ансамбль ёки оркестрга мўлжалланган эркин шаклдаги кичик мусиқа асари. Мустақил жанр сифатида биринчи марта Р. Шуман ўз ижодида қўллаган (фортепиано учун 6 та Интермеццо, 1832). Фортепиано учун И. Брамс, А. Лядов, оркестр учун М. Мусоргский И. ёзишган. Баъзан туркум асарлар (концерт, соната, трио ва б.) ёки операнинг мустақил чолғу ва хор қисмлари ҳам Интермеццо дейилади. Ўзбекистонда Г. Мушель, Ик. Акбаров, А. Козловский каби композиторлар ижодида турли чолғу асбобларга мўлжалланган Интермеццолар бор.