Алишер Навоий ҳикматларига қизиқиш ҳамма даврларда ҳам юқори бўлган. Чунки шоир ижоди — ўзига хос ҳикмат бўстони: ўзингизда туғилган ҳар қандай саволга жавоб излаб, унга мурожаат қилсангиз, аҳволи руҳиятингизга мос бирор ҳикмат топиб, мақсадингиз ҳосил бўлади. Ўйлаймизки, барча ёшдаги ва турли тоифадаги кенг китобхонлар оммасини мутафаккир шоирнинг ҳассос мисралари қатида яширин маъно дурлари билан ошно этишни кўзда тутган ушбу нашр ўқувчиларга бадиий-эстетик завқ бағишлаб, уларнинг маънавий-аҳлоқий камолотига хизмат қилади.