Мавзунинг долзарблиги. Ҳозирги кунда мамлакатда амалга оширилаётган асосий устувор вазифалардан бири – бозор муносабатларини чуқурлаштириш орқали иқтисодиётни ривожлантириш, жаҳон молиявий-иқтисодий инқирозининг Ўзбекистон иқтисодиётига салбий таъсирини мумкин қадар камайтиришдан иборатдир. Иқтисодиётни юксалтириш муаммоларини ҳал этишда товарлар ва хизматлар бозори алоҳида ўрин тутади. Айнан, товарлар ва хизматлар бозори, уларнинг самарали фаолият кўрсатиши, бир томондан истеъмолчилар, яъни аҳоли турмуш даражаси ва сифатини оширишнинг муҳим воситаси бўлса, иккинчи томондан ушбу товарлар ва хизматларни ишлаб чиқарувчи субъектларнинг доимий, узлуксиз фаолият юритиши, кенгайтирилган такрор ишлаб чиқаришни амалга ошириш учун барча зарур шароитларни яратиб беради.