Арча турлари ёруғсевар, қурғоқчиликка ва совуққа бардошли, секин ўсувчи ва узоқ яшовчи дарахтлар (600-700 йил, 2000 йил) тоифасига киради. Арчазор ўрмонлар Марказий Осиё тоғларида ўсиб минтақа иқлимига, табиий шароитларига ижобий таъсир кўрсатади. Бу таъсир уларнинг сувни муҳофаза қилувчи, тоғ дарёларини сув маромини ушлашда, тупроқларни емирилишдан ва устки оқим таъсирида ювилишдан сақлашда намоён бўлади.
Қалин арчазорлар ўсадиган тоғ дарёлари ҳавзаларида кучли ёмғирлардан кейин ҳам тупроқ устки оқими ҳосил бўлмайди, яъни сел оқимлари пайдо бўлиши кузатилмайди, демак тупроқ емирилиши ҳам кузатилмайди. Чунки арча ўрмон шох-шаббаси билан ёғингарчиликни 60-70% ушлаб қолиб аста-секинлик билан ер остки сувларига ўтказади.