Xalq ta`limi vazirligi tasarrufidagi “Xalq ta’limi” ilmiy-metodik jurnalining 2015-yil 4-soni

Xalq ta\limi vazirligi tasarrufidagi “Xalq ta’limi” ilmiy-metodik jurnalining 2015-yil 3-soni

Kitob ilm va ziyo manbai bo`lsa, ilmiy-metodik jurnallar kitob va darsliklardagi duru injularni yoshlar ongiga singdirishda, ularni barkamol shaxs sifatida voyaga yetkazishda o`qituvchi-pedagoglarga yo`l-yo`riq ko`rsatuvchi mash’aladir. Ta’lim tizimidagi yangiliklar, pedagogik texnologiyalar, ilg`or ish tajribalarni ilmiy maqolalar orqali respublikamizda ommalashtirishga munosib hissa qo`shayotgan insonlarning fidoyi mehnati tufayli jurnalimiz yil sayin talabga ega bo`lib borayotganini e’tirof etish joiz.

Bugungi kunda ilmiy-pedagogik, o`quv-metodik nashrlarning o`rni va ahamiyati tobora ortib, ta’lim taraqqiyotining ko`zgusi, pedagog-o`qituvchilar ongi, dunyoqarashi hamda siyosiy saviyasini shakllantiruvchi asosiy omilga aylanmoqda.

Mamlakatimizda barkamol avlod tarbiyasi davlatimiz siyosatining ustuvor yo`nalishlaridan biriga aylangan. Zero, millatimiz istiqboli, yurtimiz kelajagi yoshlar qo`lida. Bugungi tarbiya ertaning poydevoridir. shu bois yurtimizda ta’limni tarbiyadan, tarbiyani ta’limdan ajratmagan holda tizimli ishlar amalga oshirilmoqda.

Dunyoda integratsiyalashuv jarayoni jadal sur’atlarda davom etayotgan bugungi kunda, tabiiyki, chet tillarni mukammal biladigan mutaxassislarga ehtiyoj tobora ortib boryapti. Mamlakatimizda ta’lim tizimidagi islohotlar samaradorligini yanada oshirishda “Ta’lim to`g`risida”gi hamda “Kadrlar tayyorlash Milliy dasturi” Qonunlari doirasida amalga oshirilgan chora-tadbirlar muhim ahamiyat kasb etayotir.

O`zbekistonda yoshlarga oid davlat siyosati millati, irqi, tili, dini, ijtimoiy mavqyei, jinsi, ma’lumoti va siyosiy e’tiqodidan qat’i nazar, yoshlarni huquqiy va ijtimoiy jihatdan himoya qilish; milliy, madaniy an’analarning avloddan avlodga o`tishi, yoshlarning tashabbuslarini qo`llab-quvvatlash, jamiyat rivojiga, ayniqsa yoshlar hayotiga oid dasturlarni ishlab chiqish hamda amalga oshirishda yoshlarning bevosita ishtirok etishi; huquq va burchlarning, erkinlik va fuqarolik mas’uliyatining birligi kabi tamoyillarga asoslanadi.

Ushbu sonimizda esa, maktabgacha ta’lim, umumiy o`rta ta’lim, rahbar va pedagog xodimlarni qayta tayyorlash va malakasini oshirish tizimidagi yutuq va kamchiliklar, dolzarb muammolar, ota-onalar va pedagoglarni o`ylantirib kelayotgan masalalarning ba’zilari sizning hukmingizga havola qilinmoqda. Ularning huquqiy, nazariy, amaliy va tahliliy-tanqidiy nuqtayi nazardan bartaraf etish yo`llari, ularning oldini olishga doir ilmiy-metodik maqolalar bilan tanishishingiz mumkin.

Dunyoda kechayotgan bugungi globallashuv jarayoni har bir davlatdan xalqaro maydonda o`z o`rniga ega bo`lishi uchun, avvalo, uning barqaror rivojlanishi birlamchi omil ekanini talab qilmoqda. Bunda yuksak taraqqiy etgan davlatlarning asosiy ustunligi bevosita ta’lim tizimining samaradorligi hamda shaxsni rivojlantirish bo`yicha yaratilgan mavjud ichki imkoniyatlarga bog`liq.