ГАЛОГЕН ЖИНСЛАР — хемоген чўкинди жинслар. Арид иқдимда қуриётган денгиз ҳавзаларида, лагуналарда ва шўр сувли кўлларда тўйинган эритмалардан галогенез жараёнида кристалланади. Табиатда кенг тарқалган чўкинди жинсларнинг асосийларидан ҳисобланади. Галоген жинсларга галитдан ташкил топган галитли, сильвинли ҳамда карналлитли (карналлит, галит), гипсли (гипс), астраханитли (астраханит, галит), содали (табиий сода, мирабилит), кўп минералли (ланбейнит, каинит, кизерит, сильвин, галит, полигалит) жинслар ва б. киради. Галоген жинслар ташқи муҳит (айниқса, сув) таъсиридан тез парчаланиб эрийди. Пермь даврининг чўкинди жинслари таркибида кўп учрайди. Галоген жинслар озиқ-овқат, кимё саноати ва қ. х. да ишлатилади.