ДУСТЛАР (инг. dust — чанг) — кукун шаклидаги пестицидлар. Экинларга тушган зараркунандалар, бегона ўтларга қарши сепилади, уруғларни упалашда ишлатилади. Инсектицид, фунгицид, акарицид ёки гербициднинг инерт тўлдиргич билан оддий аралашмасидан иборат. Тўлдиргич сифатида тальк, пирофилит, бўр, каолин, трепел, сили-кагель ва ҳар хил таркибли тупроқдан фойдаланилади. Кўпинча пирофилит ва тальк қўшилади, чунки улар ўсимликка яхши ёпишади. Дустлар чангининг учиб кетишини камайтириш учун 3—5% ли минерал мой аралаштирилади (қ. Минерал мойлар). Суғорма деҳқончилик минтақаларида кемирувчи зараркунандалар (кузги тунлам, симқуртлар ва б.), ўргимчакканага қарши (олтингугурт кукуни) курашда яхши натижа беради.