ДОЛИНСК МАНЗИЛГОҲИ — Нальчик ш. яқинидаги Долинск шаҳарчасидан топилган жез даври (мил. ав. 2-минг йиллик) ёдгорлиги. Қазиш ишлари Шим. Кавказ экспедицияси томонидан олиб борилган (1930, 1932—33). Ҳар хил катталикдаги кулба қолдиқлари топилган. Кулбалар томи ва деворлари четандан, усти сомонли лой билан сувалган. Ҳар бир кулбада бир неча тандирсимон ўчоқ қолдиғи, ғалла сақланадиган ўра, куйган суяк, сопол синиқлари, тош қуроллар учрайди. Кварц, обсидиан ва чақмоқтошдан ясалган пичоқ, қирғич, ўроқ қадамалари ва ойболталар топилган. Долинск манзилгоҳида мозорқўрғонлар кўп. Кулбалар ва қабрлардан топилган ашёлар қад. долинскликлар чорвачилик ва ибтидоий деҳқончилик билан шуғулланганини кўрсатади. Уларнинг ижтимоий тузуми матриархат давридан патриархат даврига ўтиш бо-сқичида бўлган.