АЦЕТИЛЦЕЛЛЮЛОЗА — целлюлозанинг ацетат эфири. Оқ аморф модда. А. олишда хом ашё сифатида асосан пахта момиғи, айрим ҳоллардагина целлюлоза ишлатилади. Целлюлоза катализаторлар иштирокида сирка ангидрид ёки ацетил хлорид билан ацетилланса, таркибида боғланган 62,4% сирка кислота қолдиқлари бўлган триацетилцеллюлоза фақат баъзи органик эритувчилар (сирка кислота, хлороформ ва метилен хлорид)да эриганлиги учун ундан кенг кўламда фойдаланиб бўлмайди. У деярли нам тортмайди. Ацетилцеллюлоза электр изоляция материаллари, сунъий тола ва ёнмайдиган киноплёнка олишда ишлатилади. Триацетилцеллюлозанинг 92 — 96% ли сирка кислотадаги эритмаси катализатор — сульфат кислота иштирокида қисман гидролизланса, иккиламчи Ацетилцеллюлоза ҳосил бўлади. Унинг таркибида богланган 52 — 57% сирка кислота бўлиб, бир қанча арзон эритувчилар (ацетон, циклогексан, ацетон билан спирт аралашмаси, этилацетат, бутилацетат ва б.)да эрийди. Ацетилцеллюлоза ишқорлар ва минерал кислоталар таъсирига беқарорроқ, аммо нур таъсирига чидамли, ёнмайди. Шунинг учун ҳам Ацетилцеллюлоза киноплёнкалар, бўёқ ва пластмассалар и. ч. да ёнувчи нитроцеллюлоза ўрнини тобора кўп эгалламоқда.