АНИҚЛИК СИНФЛАРИ — 1) машинасозликда — деталларни аниқ тайёрлаш мезонлари. Давлат стандартлари (андозалари)да кўрсатилган йўл қўйиладиган хатолик (допуск)лар қиймати билан белгиланади. Аниқлик синфлари буюмларнинг алоҳида параметрлари (чизиқли ўлчамлари, бурчаклари, тишли ғилдиракларнинг параметрлари) да, яхлит буюм (металл кесиш станоклари ва б.)да белгиланган бўлиши мумкин. Стандарт тизимларида барча Аниқлик синфлари даги допусклар номинал (меъёрий) ўлчамга боғлиқ бўлган допуск бирлиги асосида аниқланади. Ҳар қайси допусклар тизимида бир неча Аниқлик синфлари мавжуд бўлади. Улар тартиб рақамлари билан белгиланади. Допускларнинг ошиши билан Аниқлик синфлари рақамлари ҳам ошади. «Валтешик» тизими учун 19 квалитет белгиланган (дастлабки 6 таси калибрлар, қолганлари аниқ буюмлар учун қўлланилади). Бу айтилган Аниқлик синфлари собиқ Иттифоқда амал қилган, ҳозир Россияда ҳам амал қилмоқда. Ўзбекистонда янги стандартлар қабул қилиниши муносабати б-н А. с. тоифалари ҳам ўзгартирилмоқда; 2) ўлчов воситаларининг умумлаштирилган тафсилоти; улар учун аниқликка таъсир қиладиган ва давлат стандартларида белгиланган асосий ва қўшимча хатоликлар ҳамда бошқа параметрлари чегараси кўрсаткичи вазифасини ўтайди.