АЛЬТ (итал. alto — юқори, баланд) — овоз ва соз тури;
1) хор ёки вокал ансамблда партия, хонанда болалар ёки аёллар (меццо-сопрано, контральто)нинг паст (йўғон) овози. Тенордан юқори ёзилади;
2) хонанда ўғил болаларнинг паст (йўғон) овози;
3) скрипкасимон созлар гуруҳига мансуб 4 торли камонли соз, шаклан скрипкадан каттароқ, квинта паст созга эга. Альт турли ансамблларда ва симфоник оркестрда жўрнавоз ва якканавоз соз сифатида ишлатилади;
4) Альт ёки альтгорн — пуфлама созлар оркестридаги мис соз;
5) оркестр созларининг Альт турлари: домра-А., кларнет-А., тромбон-А. ва б. Айрим ўзбек халқ чолғулари (дутор, сато, афғон рубоби)нинг диапазони Альт диапазонига тўғри келади. Ўзбек халқ чолғулари оркестри таркибидан янги яратилган дутор-А. ва ғижжак-А. ўрин олган. Ўзбекистонда ўтказиладиган торли созлар ижрочилари танловида Альт ижрочилари ҳам қатнашади. Ўзбекистон композиторлари торли Альт учун йирик асарлар яратишган (мас, Б. Зейдманнинг Альт ва симфоник оркестр учун 1—2-концерт, Альт ва фортепиано учун концертинолари; Ҳаб. Раҳимовнинг Альт ва оркестр учун концерти, А. Козловскийнинг ғижжак-, А. ва фортепиано учун сонатаси ва б).