АПЕННИН ЯРИМ ОРОЛИ — Жан. Европадаги ярим орол. Майд. 149 минг км2, эни 130 — 300 км, уз. 1100 км. Апеннин ярим оролининг жан. да Калабрия ва Салентина, шарқида Гаргано я. о. бор. А. я. о. Европага Апеннин тоғлари ва Ломбардия пасттекислиги орқали туташган. Сицилия о. дан тор Мессина бўгози билан ажралган Апеннин ярим оролини ғарбда Тиррен, шарқда Адриатика, жан. да Иония денгизлари ўраб туради. Шарқий соҳиллари шим. да ботқоқ ва лагуналар куп, жан. баланд ҳамда тоғли, ғарбий соҳиллари эса ўйдим-чуқур, тик ва кўп жойларда жарликдан иборат. Апеннин ярим оролини бошдан-оёқ Апеннин тоғлари эгаллаган. Тиррен денгизи соҳили яқинида вулкан (Везувий, Флегрей ва б.) кўп. Соҳил камбар пасттекисликлардан иборат. Апеннин ярим ороли Европанинг субтропик минтақасига киради. Иқлими илиқ, ёзи узоқ, иссиқ ва қуруқ; Ўрта денгиз буйига хос доим яшил ўсимликлар ўсади. Текислик ва тоғ олди қисмларини маданий ландшафт ташкил этади. Апеннин ярим оролида Италия (ҳудудини 73 қисми), Ватикан, Сан-Марино давлатлари жойлашган.