АНТРАНИЛ КИСЛОТА, о-аминобензой кислота, рангсиз кристалл. Мол. м. 137,14. Суюқланиш т-раси 145°. Иссиқ хлороформ, этанол ва пиридинда яхши эрийди. Ҳайдалганда карбоксил гуруҳини йўқотиб анилинга айланади. Эритмалари ширин бўлиб, кўк флуоресценцияланиш хусусиятига эга. Антранил кислота фталимиднинг ишқорий эритмасига натрий гипобромит ёки натрий гипохлорит таъсир эттириб олинади. Сирка кислота эритмасида Антранил кислота кадмий, кобальт, мис, никель, рух, молибден, қўрғошин ва симоб билан ички комплекс (кам эрувчан) бирикмалар ҳосил қилади. Унинг бу хусусиятидан мазкур элементлар миқдорини аниқлашда фойдаланилади. Антранил кислота турли азобўёклар олиш учун асосий хом ашёдир. Унинг метил эфири атир-упа и. ч. да қўлланилади.