ЖОРЖИЯ — АҚШнинг жан.шарқидаги штат. Майд. 153 минг км2. Ахолией 8,4 млн. киши (2001). Маъмурий маркази ва энг катта шаҳри — Атланта. Ж. ҳудудининг кўп қисми пасттекислик, кемалар қатнайдиган Саванна, Олтамахо, Флинт дарёлари кесиб ўтган. Шим. ва шим.-ғарбида Аппалачи тоғларининг тизмалари жойлашган. Иқлими субтропик, сернам; йиллик ёғин 1300—1600 мм. Тоғларда дуб, қарағай ва қора қайин ўрмонлари бор.
Жоржия — индустриалаграр штат. Машинасозлик, тўқимачилик, целлюлоза-қоғоз ва озиқ-овқат саноатлари ривожланган. Йирик авиация (Локхид фирмаси), автомобилсозлик, кимё корхоналари бор. Қ. х. товар маҳсулоти қийматининг ярмидан кўпроғини чорвачилик (асосан паррандачилик) беради. Асосий экинлари (маҳсулот қиймати бўйича): ер ёнғоқ, маккажўхори, тамаки, пахта. Мева ва сабзавот ҳам етиштирилади. Транспорт йўллари тугуни — Атланта; асосий денгиз порти — Саванна; четга к,, х. ва ўрмон маҳсулотлари чиқарилади, четдан нефть келтирилади.
Жоржия — АҚШда дастлаб тузилган 13 штатдан бири. 1776 й. да бошқа 12 та Англия мустамлакаси билан бирга ўзини мустақил деб эълон қилиб, АҚШни тузишда иштирок этган.