ЖЕЗОЙНА — жез ва илк темир даврида ишланган металл кўзгу. Милоднинг бошларигача шиша ойна бўлмаганлиги сабабли ойна жездан қилинган. Қад. мозорларда Жезойна кўпинча аёлларнинг зийнат буюмлари қаторида учрайди. Жезойна, асосан, дойра шаклида бўлиб, аввал дастасиз, кейинроқ (темир даврида) дастали қилиниб, турли хил нақшлар берилган. Жезойна ўрта асрлардаги баъзи ёдгорликларда ҳам учрайди. Ялтироқлигини доимий сақлаш учун Жезойна юзаси теридан қилинган нафис пардозлагич билан ишқаб турилган.