ГОРДИЙ ТУГУНИ — юнон афсонасига кўра фригиялик подшоҳ Гордий томонидан бўйинтуруқ арқонини арава шотисига читал қилиб боғланган тугун. Башоратчи (коҳиноракул)нинг сўзларига кўра, гўё кимда-ким бу тугунни еча олса, у дунёга ҳоким бўлар эмиш. Ривоят қилинишича, мил. ав. 334 й. Александр (Искандар Мақдуний)га Гордий тугунини ечишни таклиф этганларида у қиличи билан тугунни чопиб ташлаган. «Гордий тугунини чопиб ташлаш» (чигал, мураккаб масалани тез ва дадил ҳал қилиш) ибораси шундан олинган.