ГЛИОКСАЛЬ (этандиал, диформиль, оксалат альдегид) , СНО—СНО — диальдегидларнинг оддий вакили, сариқ рангли кристалл. Мол. м. 58,04. Суюкланиш т-раси 15°, қайнаш т-раси 50,4°, зичлиги 1140 кг/м3. Сувда, спирт ва эфирда яхши эрийди. Сақланганда намлик таъсирида полимерланади. Глиоксаль таркибида иккита углероди бўлган бирикмаларни оксидлаб, саноат миқёсида эса этиленгликолни мис катализатори иштирокида дегидрогенлаб олинади. Тўқимачилик, тери, қоғоз ҳамда бўёқчилик саноатида ишлатилади.